M.Seytniyazovtıń «Watan gedayı» poemasında watan ayralıǵı teması súwretlenedi. Urıs waqtında fashistlerge tutqınǵa túsken qaraqalpaq áskeri urıstan keyin eline qaytıwǵa qorqadı. Sebebi, sol dáwirdiń ideologiyası onı satqın sıpatında tınısh qoymas edi. Sonlıqtan, ol Germaniyada jasap qalıwǵa májbúr boladı. Ótken ásirdiń 80-jıllarında nemec eline dóretiwshilik jumıs penen barıp qalǵan shayır sol adamdı ushıratadı. Ol óz basınan ótken waqıyalardı aytıp beredi. Dúnya-mal, kottedj jay, bala-shaǵa… Bárine erisken bul adamǵa tek bir nárse jetispeydi. Bul – tuwǵan jer, ana watan topıraǵı. Usınday emocional sezimler menen suwǵarılǵan syujet oqıwshını ózine tartıp ketedi.