Yuriy Karlovich Oleshaning (1899–1960) bolalar uchun yozgan “Uch baqaloq” ertak-romani jahon xalqlari tillariga tarjima qilingan. Shu kitob asosida yaratilgan balet, kinofilm million-million tomoshabinlarning sevimli sanʼat asarlariga aylangan. Har avlod yoshligida bu kitobni zavq bilan qoʻliga oladi, maroq bilan oʻqib chiqadi. Zulm, istibdod, haqsizlik avj olgan Uch Baqaloq mamlakatining mehnatkashlari donishmand doktor Gaspar, mohir dorboz Tibul, mard qurolsoz Prospero, tadbirkor qizaloq Suok kabi qahramonlar bilan birgalikda boyonlar saltanatiga qarshi bosh koʻtaradilar va gʻalaba qiladilar. Ana shu jang-u jadallar ertak janriga xos qiziqarli syujet ipiga tizilgan gʻaroyib sarguzasht va voqealar orqali hikoya qilinadi.