Kitob 1404 yili Samarqandda Temur saroyida turgan Kastiliya (Ispaniya) qiroli Genrix III (1390–1406) ning elchisi Rui Gonsales de Klavixoning yoʻl xotiralaridan iborat, yaʼni uning 1403–1404 yillari Turkiya, Eron va Movarounnahrda, xususan, Amir Temur saroyida koʻrgan-bilganlarini oʻz ichiga olgan muhim bir asardir. “Kundalik”da oʻsha vaqtlarda Amir Temur qoʻl ostidagi mamlakatlar va shaharlarning umumiy ahvoli, xalqining kun kechirishi, Temur va uning yaqinlari tashabbusi bilan barpo etilgan binolar qasrlar, masjidlar, madrasalar, xonaqohlar savdo rastalari, doʻkonlar, ustaxonalar; Temuriylar davlatining Xitoy, Hindiston, Oltin Oʻrda (Klavixo uni Tatariston deb ataydi), Moʻgʻuliston va boshqa mamlakatlar bilan boʻlgan siyosiy va savdo aloqalari, Temur saroyida amalda boʻlgan tartib-qoidalar va, nihoyat, sohibqironning xotinlari va ularning mamlakatning ijtimoiy-siyosiy hayotida tutgan oʻrni haqida eʼtiborga molnk maʼlumotlar keltirilgan. Bu maʼlumotlar, shubhasiz, Turkiston zaminning oʻsha vaqtlardagi ijtimoiy-siyosiy tarixini, ota-bobolarimizning turmush tarzini oʻrganishda muhim tarixiy manbalardan biri rolini oʻtashi turgan gap.