Buyuk shoir A. S. Pushkin (1799–1837) haqli ravishda “rus sheʼriyatining quyoshi” deb ataladi. Uning nurga, ziyoga, hur fikrlarga, ezgu tuygʻularga toʻla sheʼrlari, dostonlari, nasriy asarlari va dramalari har doim sevib, eʼzozlanib oʻqiladi. Bolalar A. S. Pushkinning “Shoh Sulton haqida ertak”, “Baliqchi va oltin baliq haqida ertak”, “Oʻlik malika” hamda boshqa sheʼriy ertaklarini hayajon bilan oʻqiydilar. “Ruslan va Lyudmila”, “Kavkaz asiri”, “Boqchasaroy fontani” kabi dostonlari balogʻat yoshidagi yigitlarning qoʻlidan tushmaydi. Undan keyin “Yevgeniy Onegin”, “Kapitan qizi”, “Boris Godunov”ga navbat keladi. Ulugʻ shoirning mahorat bilan oʻzbek tiliga tarjima qilingan bu ajoyib asari siz, aziz kitobxonlar uchun munosib tuhfa boʻlishiga ishonamiz.