Zamonamizning eng mashhur amerikalik yozuvchilaridan biri, “Shuʼla”, “Oʻlik hudud”, “Yashil yoʻlak”, “Rita Xeyvort yoxud Shoushenkdan qochish”, “Chekishni tashlang korporatsiyasi” singari bir-biridan ajoyib-u gʻaroyib roman va qissalar, betakror hikoyalar muallifi Stiven King allaqachon Gʻarbda oʻz oʻquvchilarini topib ulgurgan. Adibning oʻzbek kitobxonlariga taqdim etilayotgan “Qora Minora” turkumining birinchi kitobi hisoblanmish “Mergan” romanining bosh qahramoni Roland “joyidan siljigan dunyo”dagi soʻnggi olijanob mergan. U nima boʻlgan taqdirda ham kuch-qudrat oʻchogʻi, koinotning poydevor toshi Qora Minorani izlab topishi kerak. Bir kun kelib bu Minorani topadi ham, lekin hozircha uning chekiga sehrgarlik ila boshqarilmish, baʼzan bizning olamimizga-da eshik ochilib turiladigan dunyo boʻylab sayohatga chiqish yuki tushgan...