Qariyib oltmish yildan beri o‘zbek tomoshabinlari qalbini maftun etib kelayotgan bu kino asar ikki avlodning ziddiyatli o‘y-qarashlaridan bahs etadi. Onalar va bolalar, Toshkentning qadim mahallasi va unga yondosh zamonaviy ko‘p qavatli turar joy binosi, aytish joiz bo‘lsa, eskilik va yangilik, ular o‘rtasidagi ilg‘ab-ilg‘anmaydigan kurash sahnalari engil kulgu bilan ifoda topadi. «Mahallada duv-duv gap» o‘z davridayoq dovruq qozongan, nafaqat O‘zbekistonda, balki yaqin –uzoq xorijda ham e’tirofga sazovor bo‘lgan. Atoqli kino rejissyor Shuhrat Abbasov yaratgan bu betakror film o‘zbek kinosining yo‘lchi yulduzi, etib bo‘lmas marrasi bo‘lib kelmoqda.Asar qahramonlarining xatti-harakatlari, o‘zbekona lutfu barchamizga yod bo‘lib ketgan.