"Edvarda" qalbingizga muhabbatdek oliy tuygʻuga ehtiromni singdiradi, ishqni, xususan, unga koʻrsatilajak sadoqat va vafoni qadrlash lozimligini anglatadi. Binobarin, asar mutolaasi asnosida Siz MUHABBAT degan oliy tuygʻu hazrati Odamdan boshlab to shu kunga qadar va bundan keyin ham har bir kishining qalb gavhari, maslagi-yu matlabi, uni mudom ulugʻ ishlarga, ezguliklarga chorlaguvchi yoʻlchi yulduzi boʻlib qolaverishiga qayta-qayta iqror boʻlganingizga shubham yoʻq.