"Gyustav Floberning eng katta romani – “Bovari xonim” fransuz adabiyotining eng mashhur asarlaridan biridir. Bosh qahramon – Emma Bovarining hayoti, turmush tarzi, orzu-istaklari va nihoyat fojiasi haqida hikoya qiladigan ushbu roman aslida nafaqat oʻsha davr, balki hoy-u havasga berilgan ayolning hamma zamon va barcha makonlardagi fojiasidir. Emma nomunosib turmush yoki taqdirning noloyiq jufti sabab oʻz hayotini oʻzgartirish va oʻzicha goʻzal hayot qurish sari intiladi. Boy va kelishgan xushtor ayolga qanchalik baxt bera oladi yoki qadrli va sevikli boʻlish uchun er qanday fazilat va imkoniyatlarga ega boʻlishi lozim? Taqdir yoʻrigʻiga rozi boʻlmagan inson oʻz hayotini qanchalik oʻzgartira oladi? Yoki taqdir insonga qanchalik bogʻliq? Bovari xonim timsolida yengil hayot va qiyinchiliksiz farogʻatdan bahramand boʻlish istagi insonni oxir-oqibat fojiaga, hatto butun oilasining tanazzuliga sabab boʻlishi yorqin tasvirlarda ifodalanadi."