Qissada ayolning hayotida oila, farzand tarbiyasi nechogʻli muhim ahamiyatga ega ekanligi, uning millat, xalq oldidagi qarzdorlik masʼuliyatining umumlashmasi Zulfizar obrazida mujassamlashgan. Muallif Zulfizar obrazining xarakterli jihatlariga davr fojiasi nuqtayi nazaridan yondashadi. Zulfizar juda aqlli, ilmli, ichi butun ayol. Afsuski, davr, muhit uning kuchini, aqlini oʻzga yoʻlda sarflashga mahkum etadi. U soxta gʻoyaga aldanadi, umrini, borini, eʼtiqodini “qurbonlik” qiladi, xiyonat koʻradi, ammo hech bir oʻrinda ayollik shaʼnini, nomusini sotmaydi, axloq qoidalaridan chetga chiqmaydi.