Markaziy Osiyo xalqlari madaniyatini oʻrta asr sharoitida dunyo madaniyatining oldingi qatoriga olib chiqqan buyuk mutafakkirlardan biri Abu Ali ibn Sino boʻlib, u Yevropada Avitsenna nomi bilan mashhurdir. Oʻn yoshidayoq Qurʼoni karimni boshdan-oyoq yod oʻqir edi. Oʻn uch yoshlaridan boshlangʻich matematika, mantiq, fiqh, falsafa ilmlari bilan shugʻullana boshlaydi. U oʻzidan avval oʻtgan Sharq mutafakkirlarining asarlarini chuqur oʻrganish bilan birga, Aristotel, Yevklid, Ptolemey, Galen, Gippokrat, Pifagor, Parfiriylarning asarlarini ham qunt bilan oʻrgandi. 16-17 yoshidayoq Ibn Sino mashhur tabib – hakim boʻlib tanildi. Ibn Sino asarlari Yevropada XII asrdan boshlab lotin tiliga tarjima qilingan. Ushbu kitobda Abu Ali ibn Sino hamda uning ilmiy-ijodiy faoliyati xususida soʻz boradi. Risola keng oʻquvchilar ommasi uchun moʻljallangan.