Qadim Turon zaminida azal-azaldan koʻplab buyuk ulugʻ sarkardalar, fidoyi qahramonlar yashab oʻtganlar. Toʻmor (yunonchada – Toʻmaris), Spitaman, Shiroq kabi koʻplab qahramonlar xotirasi hali-hanuz elimiz tomonidan ardoqlanib, yod etib kelinmoqda. Ularning jasoratlari haqida koʻplab hikoyatlar, rivoyatlar ijod etildi, yozuvchilar, shoirlar, adiblar tomonidan romanlar, dostonlar, qissalar bitildi. Xalqimizning suyukli qahramoni Shiroqning jasorati haqidagi ilk maʼlum otlar yunon tarixchisi Poliyenning sakkiz kitobdan tarkib topgan “Strategmalar” (“Harbiy hiylalar”) nomli asarida bayon etilgan. Miloddan avvalgi VI asrda yashagan Shiroq bobomiz Turon tuprogʻini istilo etishga uringan axamoniylar podshosi Doro Birinchining koʻp ming kishilik lashkarini yolgʻiz oʻzi mahv etib, sak (shak) qabilalarini istibdod zulmidan asrab qolgan, el-yurt ozodligi yoʻlida jonini qurbon qilgan. Eʼtiboringizga havola etilayotgan qissa muallifi mard va jasur xalq qahramoni Shiroqning hayot yoʻli, maqsad-istaklari, fidoyilik, vatanparvarlik tuygʻularini aks ettirish orqali ulugʻ bobokalonimizning timsolini yoshlarga namuna sifatida gavdalantiradi. Ushbu asar kamol topib kelayotgan avlodni xalqparvar, oʻz Vataniga, el-yurtiga sadoqatli, erkli hayotning, hurriyatning qadrini baland bilguvchi insonlar etib tarbiyalashda bir saboq boʻlib xizmat qiladi.
