“Qutadg‘u bilig” Oʻrta Osiyo, Sharqiy Turkiston va Qozog‘iston turkiy xalqlari badiiy adabiyotining o‘n birinchi asrga mansub va hozircha bizgacha yetib kelgan ilk namunasi bo‘lib, tom ma’nosi bilan ta’limiy-tarbiyaviy ruhda yozilgan didaktik asardir. Bu yodgorlik turkiy xalqlar tarixini, ijtimoiy-siyosiy tuzumini o‘rganish uchun ashyoviy dalillarga nihoyatda boy bo‘lib, unda axloq-odob, ta’lim-tarbiya, ilm-ma’rifat, turli ijtimoiy tabaqalar o‘rtasidagi munosabat-muomala normalari haqida bahs etiladi, davlatni idora qilish usullari, o‘sha davr hayoti normalarining tizimi bayon qilinadi. Asar tarixshunoslik, etnografiya uchun muhim manba hisoblangani kabi, adabiyotshunoslik va tilshunoslik uchun ham alohida ahamiyat kasb etadi. U Oʻrta Osiyo turkiy tillari va adabiyoti tarixini oʻrganish, adabiyotshunoslik, tarixiy, qiyosiy-tarixiy grammatiklar va leksikografiya bo‘yicha olib boriladigan ilmiy-tekshirish ishlari uchun boy va qimmatli material beradi.
