Yozuvchi Otabek Quvvatning “Olimjonning sarguzashtlari yoxud zamon va makon oraligʻida” asari sarguzasht-fantastik qissa boʻlib, uni oʻziga xos badiiy qimmatga ega deyish mumkin. Unda bir guruh oʻsmirlarning boshidan kechirgan sarguzashtlari orqali bolalarni yaxshilikka, ezgulikka undash gʻoyalari qalamga olingan. Kitob qahramoni Olimjon – aʼlochi oʻquvchi. Kitob oʻqishni, kompyuterda dasturlar bilan ishlashni juda yoqtiradi. U yangi dastur yaratish orqali dunyoni yovuzlikdan, yomonliklardan xalos qilmoqchi boʻladi. Shu maqsadda sirli kalitni izlab topish uchun olamlararo sayohatga yoʻl oladi. Bunda unga Doniyor hamda Turgʻun ismli yaqin doʻstlari yordam beradilar. Asarda Olimjonning sarguzashtlari, qahramonliklari, jasorati qiziqarli voqealarda tasvirlanadi.