Aral mashqalası. Ekologiyalıq apatshılıqlar. Teńizdiń óz jaǵasın taslap qashıwı. Sonıń aqıbetinde xalıqtıń arasında túrli keselliklerdiń kóbeyiwi, balalar arasında ólimshiliktiń artıwı, adamlardıń óz jurtın taslap basqa jaqlarǵa kóship ketiwge mújbúr bolıwı, h.t.b. waqıyalardı jazıwshı kórip-bilip turıp hújdanı shıdamaydı. Onı joqarı minberlerde turıp aytsa da hesh kim tıńlamaydı, bul mashqalalardı sheshiwge hesh kim járdem qolın sozbaydı. Sonda avtor bulardı o dúnyadaǵı atasına xat jazıw arqalı bayan etiwge májbúr boladı. Shıǵarma esse formasında jazılǵan. Ondaǵı ashshı haqıyqatlıqlar kimdi bolsa da oylandırmay qalmaydı.