Adabiyot sohasida Nobel mukofoti berilishi adabiyotshunoslar, adiblar va kitobsevarlar uchun muhim voqea. “Kimga berilibdi?”, “Qaysi asari uchun?”, “Qayerdan ekan u baxtli adib?” va hokazo savollar biri ikkinchisiga ergashib kelaveradi. Qisqasi, mukofot sohibi biografiyasining ipidan ignasigacha, asarining obroʻsi va tahlilidan muallif mukofot topshirish vaqtida nimalar deganigacha – hammasi ijodkor uchun nimadir beradi, uni ezgu ishlarga undaydi. Nobel mukofoti 1901-yildan boshlab beriladi. Barcha laureatlar haqida toʻliq maʼlumot beradigan kitob 1986-yili ingliz tilida, 1992-yili rus tilida nashr qilindi. Lekin oʻzbek kitobxonlari oʻqiy oladigan rus tilidagi kitob ham juda noyob, Bundan tashqari, har yili bittadan laureat qoʻshilib turibdi. Shularni hisobga olib, 1901–2000-yillarda mukofot olgan adiblarning biografiyalari, ayrimlarining mukofot topshirish vaqtidagi nutqlari, esdaliklari, baʼzi asarlarning moʻjazgina tahlili mazkur toʻplamga kiritildi.