Iogann Kristof Fridrix Shiller — nemis shoiri, dramaturg, tarixchi, san’at nazariyotchisi. Nemis mumtoz adabiyotining asoschilaridan. V.G.Belinskiy ta’biri bilan aytganda, o‘z ijodi, ardoqlagan g‘oyalari bilan “insoniyatning oliyjanob himoyachisi”ga aylangan, F.M.Dostoevskiy “insoniyatning do‘sti” deb atagan, A.I.Gertsen “oliyjanob tuyg‘ular shoiri” deb ulug‘lagan F.Shillerning ijodi bag‘oyat rang-barang. U “Qaroqchilar”, “Makr va muhabbat”, “Mariya Styuart”, “Don Karlos”, “Vilgelm Tell” kabi jahon adabiyotini boyitgan dramalar, ohanraboli she’rlar, mashhur balladalar, novella, roman, nemis nasrining ajoyib namunalariga aylangan yirik tarixiy tadqiqotlar, san’at tarixi va estetikaga bag‘ishlangan teran maqolalar muallifi.Shillerning tragediya janridagi eng yaxshi asarlaridan biri «Mariya Styuart» bo‘lib, uning syujeti 16-asrdagi Angliya hayotidan olingan.Bu asar O‘zbek Milliy akademik drama teatrida sahnalashtirilgan.