Oʻzbekiston xalq yozuvchisi, Davlat mukofoti laureati, Berdaq nomidagi Qoraqalpogʻiston davlat mukofoti sohibi, professor Muhammad Ali qalamiga mansub nasrda Amir Temur hayoti va davriga bagʻishlangan toʻrt tomlik “Ulugʻ saltanat” epopeyasi, “Sarbadorlar” dilogiyasi, “Boqiy dunyo” sheʼriy romani, “Mashrab”, “Gumbazdagi nur” dostonlari, “Navoiy va Boyqaro” tarixiy dramasi, jahon adabiyotidan qilgan tarjimalari xalqimiz orasida sevib oʻqiladi. Adib yaqinda xalqimizning tarixiy ildizlarini oʻrganishga qaratilgan, Misr hayotidan olib yozilgan yangi “Kleopatra” tarixiy romanini oqqa koʻchirdi. Qiziqarli syujet chizigʻiga ega bu roman buyuk milliy qahramonimiz Spitamen avlodi boʻlgan, mashhuri zamon momomiz, miloddan avval 69–30-yillarda yashagan Misr mamlakatining soʻnggi malikasi, goʻzal va qudratli ayol Kleopatraning suronli hayotiga bagʻishlangan. Shirali tilda yozilgan romanda qadimgi Misr va Rim manzaralari, oʻsha davr etnik qatlamlari va xalqlari hayoti koʻrinishlari, yunon afsonalari oʻz aksini topgan.