«Kelinlar qo‘zg‘oloni»...O‘zbek nasrining peshqadam arboblaridan biri, O‘zbekiston xalq yozuvchisi Said Ahmad asari asosida sahnalashtirilgan bu spektaklni yodga olishingiz bilan yuzingizga tabassum yuguradi. Uni qayta-qayta tomosha qilsangiz-da g‘ashingizga tegmaydi. 1984 yilda sahna yuzini ko‘rgan spektakl yillar osha hamon sevimli bo‘lib yashab kelayotgan san’at durdonalaridan biridir. Milliy teatr san’atimizni dunyoga tanitgan bu spektakl radiomontaji ham yurtdoshlarimiz ko‘nglidan munosib joy olgan.