Pushkinning rus madaniyati taqdiridagi oʻrni benihoya buyuk. Shu boisdan uni oʻz xalqining jonkuyar isteʼdodi sifatida ulugʻlaydilar. Aleksandr Sergeyevich Pushkinning ijod namunalaridan biri “Kapitan qizi” oʻzida ijtimoiy-tarixiy hamda axloqiy gʻoyalarni mujassam etgan. Muallif ushbu asarda tarixiy gʻalayonlar ichida qolib ketgan qahramonlarning taqdiri qanday kechganini koʻrsatib beradi. Asarda shunchaki muhabbat emas, balki uning fonida xalq muammosi yaqqol namoyon boʻladi. Qissada 1773–1774-yillarda boʻlib oʻtgan Pugachev qoʻzgʻoloni haqida hikoya qilinadi.