I.Yusupovtıń qaraqalpaq ádebiyatında poema janrın rawajlandırıwǵa qosqan úlesi salmaqlı. Shayırdıń dóretiwshiliginde úlken orın iyeleytuǵın poemalarınıń biri – bul «Búlbil uyası». Poemada tiykarınan ekinshi jer júzlik urıs dáwirindegi tılda bolǵan waqıyalar sóz etiledi. Shıǵarmanıń bas qaharmanı muǵallimniń ayanıshlı táǵdiri búlbil hám onıń uyası menen salıstırılıp súwretlenedi. Urıstıń insan basına salǵan baxıtsızlıǵı, sol dáwirde jasaǵan adamlardıń ayanıshlı táǵdiri kimdi bolsa da eljiretpey turmaydı. Poemadan tásirlengen hár bir oqıwshı usı kúnlerdegi tınıshlıqqa shúkirlik etiwi anıq.