Har bir inson farovon hayot kechirishni, oilasi tinch, ishlari unumli, sogʻligʻi mustahkam boʻlishini istaydi. Biroq bu narsa hammaga ham nasib etavermaydi. Chunki baxtga erishishning oʻz mezonlari bor. Qolaversa, baxtni pulga sotib olishning iloji yoʻq. Zero, baxt doim ham moddiyatga bogʻliq emas. Hayotda toʻkis baxtga erishgan insonlar juda kam. Kimningdir sogʻligʻi yaxshi boʻlsa, roʻzgʻor tebratishda, tirikchilikda muammolari bor. Yana kimningdir topish-tutushi yaxshi-yu, sogʻligʻi yomon, oilasi notinch. Toʻkis baxtga erishish uchun inson oldida qandaydir toʻsiqlar, muammolar turadi. Ularni yechish uchun yetarli ilm, koʻnikma, hayotiy tajriba talab etiladi. Qoʻlingizdagi “Baxtli hayot sari” kitobidan qalb xotirjamligi, oilaviy totuvlik, sogʻlik-salomatlik haqidagi maʼlumotlar oʻrin olgan. Jumladan, oila qurish arafasida turgan yoshlarga foydali maslahatlar berilgan, turmushda uchraydigan muammolarni hal etish, sogʻliqni saqlash, kasalliklar oldini olish, moddiy, ruhiy illatlarni davolash borasida yoʻl-yoʻriq koʻrsatilgan.
