Shavkat Rahmon XX asr oʻzbek adabiyotining zabardast namoyandalaridan biridir. Uning sheʼriyati – oʻlmas sheʼriyat. Bu sheʼriyat inson yuragini har gal larzaga solib yuboradi, aqlini shoshiradi, oʻylashga undaydi. Shoir ijodi bilan ilk bora tanishayotgan kitobxon oʻqish chogʻida sezgilari noziklashib, tuygʻulari oʻtkirlashib, tevaragiga, odamlarga, voqea-hodisalarga qarashlari teranlashib borayotganini his etadi. Mutolaa bitgach esa, tuyqus oʻzini qoʻyarga joy topa olmay qoladi. Sababi, shoir oʻzi aytgan gapga ne qadar chin koʻngildan ishongan boʻlsa, uning soʻzi bilan amali bir ekaniga oʻquvchi ham shu qadar ishonadi. Chunki Shavkat Rahmonning soʻzi tirik, soʻzida oʻzi tirik!