Toʻylar, turli marosimlar bilan bogʻliq muammolar, isrofgarchilik va dil xiraliklar hamma vaqt asosiy muammo boʻlib kelgan. Bunga sabab, insonlarning tor dunyoqarashi, atrofdagi odamlarning gapiga qarab ish qilishi va albatta haddan ortiq orzu-havasga berilishidir. Bunday insonlar nafaqat oʻzini balki, boshqalarni ham qiyin vaziyatda qoldirishi, hattoki hayotiga zomin boʻlishi ham mumkin. Jadidchilik harakatining yirik namoyondasi hisoblangan Abdulla Qodiriy oʻzining “Baxtsiz kuyov” nomli dramasida aynan shu kabi muammolarni koʻtargan. Muallif qoloq odatlardan biri – hashamatli toʻy ortiqcha sarf-xarajatlar va ularning koʻngilsiz oqibatlarini yoritadi.
