Oʻzbekiston xalq yozuvchisi Pirimqul Qodirovning “Amir Temur siymosi” nomli ilmiy badiasida Amir Temurning butun jahon eʼtiborini tortgan ulugʻ zafarlari, buyuk sohibqironning shaxsiyati qiziqarli syujet, puxta oʻylangan kompozitsiya, ilmiy tafakkur orqali jozibali tasvir etilgan. Sohibqiron Amir Temur jahon tarixida yorqin iz qoldirgan, Vatanni bosqinchilar asoratidan ozod etib, el-u yurtni mustamlaka zulmidan xalos etgan shaxs sifatida tilga olinadi. Sarkarda nafaqat oʻz xalqida, balki boshqa yurtlarda ham koʻrsatgan qahramonliklari tufayli hanuzgacha eʼtirof etiladi.
